Togtrafikken er i gang på nye Drammen stasjon

På det nye dobbeltsporet kan toga køyra fortare. To jernbanespor gir også moglegheit for fleire avgangar og betre kapasitet på jernbanenettet. Dei seks nye spora på Drammen stasjon og dobbeltsporet vil til saman gi meir rom for fleksibilitet i togtrafikken, og fleire tog i rute over tid.

– Dette er ein stor milepæl for passasjerane, togselskapa og oss. Den nye infrastrukturen legg til rette for betre flyt på Vestfoldbanen og gjennom Drammen, og vil på sikt gi fleire punktlege tog i heile regionen, seier fungerande konsernsjef i Bane Nor, Jon-Erik Lunøe.

Dobbeltspor gir betra punktlegheit

Dobbeltsporet mellom Drammen og Kobbervikdalen er 10 kilometer langt, og går gjennom den nye Drammenstunnelen. På dobbeltspora Bane Nor har bygd dei siste åra har punktlegheita vorte betre.

– Vi ser ein positiv effekt av nye dobbeltspor fleire stader i landet. Dobbeltspor fjernar flaskehalsar, og sikrar at toga kan køyra forbi kvarandre når feil oppstår på eit spor eller eit tog. Det betyr også at tog slepp å venta på kryssingar av andre tog. Dobbeltspor gjer det lettare og meir effektivt å reisa for både passasjerane og dei som fraktar gods med toget, seier Lunøe.

Drammen stasjon modernisert

På Drammen stasjon har Bane Nor lagt fleire jernbanespor, bygd fleire plattformer og heva heile stasjonsområdet 40 centimeter slik at stasjonen er betre rusta mot flaum.

Stasjonen har vore stengd sidan 28. juni medan Bane Nor har fornya stasjonen. Når vi fornyar og byggjer ny jernbane må passasjerane i kortare periodar ta buss for tog fordi vi må ha tilgang til sporet for å kunna gjera jobben.

– Vi har forståing for at periodar med buss for tog er krevjande for passasjerane. Me takkar for tolmodet, og ser fram til at særleg pendlarane får ein betre reisekvardag igjen, seier Lunøe.

Det første rutetoget som køyrde gjennom den nye Drammenstunnelen søndag morgon, kom Drammen til stasjon kl. 07. 45.

Viktig for miljø og samfunn

Bygginga av dobbeltsporet mellom Drammen og Kobbervikdalen er eit sentralt bidrag til å nå nasjonale klima- og miljømål. Når kapasiteten på Vestfoldbanen blir auka, kan fleire velja tog framfor bil og buss, og godstrafikken får betre rammer.

– Meir på skjener set mindre spor. Med dette prosjektet bidrar vi til eit grønare transporttilbod som gjer det enklare for fleire å velja toget, seier Jon-Erik Lunøe.

Når dobbeltsporet mellom Nykirke og Barkåker opnar i 2026, blir det mogleg å køyra fire tog i timen mellom Drammen og Tønsberg. Dette kan tidlegast skje med ruteendringa i desember 2026.

Større markering i september

Den offisielle opninga skjer 18. september på Strømsø torg, med talar, kulturinnslag og aktivitetar for barn.

– I dag handlar det om å få trafikken trygt i gang. Så skal vi snart feira dette saman med alle som har bidradd og med heile Drammen by, seier prosjektsjef i Bane NOR Utbygging, Hanne Stormo.